ଭୁବନେଶ୍ୱର : ରାଜ୍ୟରେ ଅଙ୍ଗନବାଡି କର୍ମୀ ଓ ସହାୟିକାମାନେ ଯେତିକି ପାଉଣା ପାଉଛନ୍ତି ତାହାର ସିଂହଭାଗ ରାଜ୍ୟ ସରକାରଙ୍କ ତହବିଲରୁ ଯାଉଛି । ଅଙ୍ଗନବାଡ କର୍ମୀଙ୍କ ପାଇଁ କେନ୍ଦ୍ର ସରକାର ମାସକୁ ୨୭୦୦ ଟଙ୍କା ଯୋଗାଇ ଦେଉଥିବାବେଳେ ସହାୟିକାଙ୍କ ପାଇଁ ଦେଉଛନ୍ତି ୧୩୫୦ ଟଙ୍କା ।
ବର୍ତ୍ତମାନ ରାଜ୍ୟରେ ଅଙ୍ଗନବାଡି କର୍ମମାନେ ମାସକୁ ୧୦ହଜାର ଟଙ୍କାର ମାନଦେୟ ପାଉଛନ୍ତି । ଏହି ପାଉଣା ପ୍ରଦାନ ପାଇଁ ରାଜ୍ୟ ସରକାର ନିଜର ଅଂଶଧନ ସହିତ ଅତିରିକ୍ତ ଭାବେ ୫୫୦୦ ଟଙ୍କ ଯୋଗାଇ ଦେଉଛନ୍ତି । ଅଙ୍ଗନବାଡି କର୍ମୀଙ୍କର ମୂଳ ପାଉଣା ହେଉଛି ମାସକୁ ୪୫୦୦ ଟଙ୍କା । ଏହାର ୬୦ ପ୍ରତିଶତ ଅଂଶ ବାବଦକୁ କେନ୍ଦ୍ର ସରକାର ୨୭୦୦ ଟଙ୍କା ଯୋଗାଇ ଦେଉଥିବାବେଳେ ରାଜ୍ୟ ସରକାର ୧୮୦୦ ଟଙ୍କା ପ୍ରଦାନ କରିଥାନ୍ତି । ଏହାବାଦ୍ ରାଜ୍ୟ ସରକାର ନିଜ ତହବିଲରୁ ଆଉ ୫୫୦୦ ଟଙ୍କା ଦେବା ଫଳରେ କର୍ମୀମାନେ ମାସକୁ ୧୦,୦୦୦ ଟଙ୍କା କରି ପାଉଛନ୍ତି । ବିଜେପି ବିଧାୟକ ଟଙ୍କଧର ତ୍ରିପାଠୀଙ୍କ ପ୍ରଶ୍ନରେ ବିଧାନସଭାରେ ଏହି ସୂଚନା ଦେଇଛନ୍ତି ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଭାତୀ ପରିଡା ।
ସେହିଭଳି ଅଙ୍ଗନବାଡି ସହାୟିକାମାନଙ୍କର ମୂଳ ଦରମା ମାସକୁ ୨୨୫୦ ଟଙ୍କା ହୋଇଥିବାବେଳେ ରାଜ୍ୟ ସରକାର ନିଜସ୍ୱ ଅର୍ଥରୁ ଅତିରିକ୍ତ ଭାବେ ୨୭୫୦ ଟଙ୍କା କରି ଯୋଗାଉଛନ୍ତି । ତେବେ ମୂଳ ଅର୍ଥ ୨୨୫୦ ମଧ୍ୟରେ କେନ୍ଦ୍ର ସରକାର ତାଙ୍କର ୬୦ ପ୍ରତିଶତ ଅଂଶଧନ ବାବଦକୁ ୧୩୫୦ ଟଙ୍କା ପ୍ରଦାନ କରୁଥିବାବେଳେ ରାଜ୍ୟ ସରକାର ତାଙ୍କର ୪୦ ପ୍ରତିଶତ ଅଂଶ ବାବଦକୁ ୯୦୦ ଟଙ୍କା ଦେଇଥାନ୍ତି । ତେବେ ଅତିରିକ୍ତ ଭାବେ ୨୭୫୦ ଟଙ୍କା ଦେବାପରେ ସହାୟିକାମାନେ ମାସକୁ ୫୦୦୦ ଟଙ୍କା କରି ପାଉଛନ୍ତି । ତେବେ ଅଙ୍ଗନବାଡି କେନ୍ଦ୍ରରେ କାର୍ଯ୍ୟରତ ସୁପରଭାଇଜରମାନଙ୍କ ମାସିକ ଦରମାର ୩୫,୪୦୦-୧,୧୨,୪୦୦ ଧାର୍ଯ୍ୟ ହୋଇଛି ।
ପାଉଣା ବୃଦ୍ଧି ସତ୍ୱେ ଅଙ୍ଗନବାଡି କର୍ମୀମାନେ ଗତ ୫ବର୍ଷ ମଧ୍ୟରେ ରାଜଧାନୀରେ ନିଜର ଦାବି ପୂରଣ ପାଇଁ ଏକାଧିକ ଥର ଆନ୍ଦୋଳନ କରିଥିବା ମନ୍ତ୍ରୀ କହିଛନ୍ତି । ଏହି ଦାବିଗୁଡିକ ମଧ୍ୟରେ ସେମାନଙ୍କୁ ସରକାରୀ କର୍ମଚାରୀର ମାନ୍ୟତା, ବରିଷ୍ଠତା ଭିତ୍ତିରେ ମାସିକ ପାରିଶ୍ରମ ସହିତ ଇନକ୍ରିମେଣ୍ଟ, ଟିଏ, ଡିଏ ଆଦି ରହିଛି । ସେହିଭଳି ଅଙ୍ଗନବାଡି କର୍ମୀମାନଙ୍କୁ ସୁପରଭାଇଜର ପଦବୀକୁ ଯିବାପାଇଁ ବ୍ରୟସସୀମା ବାବଦ ଦେବା ସହିତ ପଦୋନ୍ନତି ଦେବାପାଇଁ କହୁଛନ୍ତି ।
ସେହିଭଳି କର୍ମୀ ଓ ସହାୟିକାଙ୍କ ଦରମା ବୃଦ୍ଧି ସହିତ ଗ୍ରାଚୁଇଟି, ପେସନ ଓ ଅବସରକାଳୀନ ସହାୟତା ରାଶି ବୃଦ୍ଧି କରାଯାଉ । ପ୍ରି ସ୍କୁଲ ଶିଶୁମାନଙ୍କ ପୋଷାକ ର ମୂଲ୍ୟ ବୃଦ୍ଧି କରାଯାଉ । ଗାଁ କଲ୍ୟାଣ ସମିତିର ଆବାହିକା ପଦବୀରୁ କର୍ମୀଙ୍କୁ ବାଦ୍ ଦିଆଯିବା ସହିତ ଏସଏନପି ଓ ଏମଏସପିୱାଇ ବାବଦରେ ଫଣ୍ଡ୍ ନିୟମିତ କରାଯାଉ । କର୍ମୀ ଓ ସହାୟିକାଙ୍କୁ ଦୁଇବର୍ଷର ପୋଷାକ ବାବଦକୁ ଅର୍ଥ ପ୍ରଦାନ ସହିତ ସୋମାନଙ୍କ ପୋଷାକର ରଙ୍ଗ ବଦଳାଇବାପାଇଁ ମଧ୍ୟ ଦାବି କରୁଛନ୍ତି ।
ତେବେ ରାଜ୍ୟ ସରକାର ସେବା ନିବୃତ୍ତ ସମୟରେ ଅଙ୍ଗନାବାଡି କର୍ମୀଙ୍କୁ ଏକ ଲକ୍ଷ ଓ ସହାୟିକାକୁ ୫୦ହଜାର ଟଙ୍କା ଦେବାର ବ୍ୟବସ୍ଥା କରିଛନ୍ତି । କୌଣସି କାରଣରୁ କର୍ମୀ ଓ ସହାୟିକାଙ୍କର ମୃତ୍ୟୁ ହେଲେ କିମ୍ବା ଦୁର୍ଘଟଣାରେ ସ୍ଥାୟୀ ଅକ୍ଷମତା ହେଲେ ୨ଲକ୍ଷ ଟଙ୍କା ଏବଂ ଆଂଶିକ ଅକ୍ଷମତା ହେଲେ ୧ଲକ୍ଷ ଟଙ୍କାର ଅନୁକମ୍ପାମୂଳକ ସହାୟତା ରାଶି ଦେବାର ବ୍ୟବସ୍ଥା ରହିଛି । କର୍ମୀ ଓ ସହାୟିକାମାନଙ୍କୁ ପ୍ରତିବର୍ଷ ୨ଖଣ୍ଡ ଲେଖାଁଏ ଶାଢୀ ପ୍ରଦାନ କରାଯାଉଛି । ଅବସରକାଳୀନ ପ୍ରୋତ୍ସାହନରାଶିକୁ ସହାୟିକାଙ୍କ ପାଇଁ ୧ଲକ୍ଷ ଟଙ୍କା ଏବଂ କର୍ମୀଙ୍କ ପାଇଁ ୫୦ହଜାର ଟଙ୍କାକୁ ବୃଦ୍ଧି କରାଯାଇଛି । ଖାଲିପଡିଥିବା ୧୦୯ଟି ସୁପରଭାଇଜର ପଦବୀ ଅଙ୍ଗନବାଡିକର୍ମୀଙ୍କୁ ପଦୋନ୍ନତି ଦେଇ ପୂରଣ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି ।(ତଥ୍ୟ)