ଭୁବନେଶ୍ବର : ଜୁନ୍ ପହିଲାରେ ଶେଷ ପର୍ଯ୍ୟାୟରେ ହେବାକୁ ଥିବା ରାଜ୍ୟର ୬ଟି ଲୋକସଭା ଆସନ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ୬୬ ଜଣ ପ୍ରାର୍ଥୀଙ୍କ ମଧ୍ୟରୁ ୨୦ ଜଣ କୋଟିପତି।
ଚତୁର୍ଥ ପର୍ଯ୍ୟାୟ ନିର୍ବାଚନରେ ବାଲେଶ୍ୱର, ଭଦ୍ରକ, ଜଗତସିଂହପୁର, ଯାଜପୁର, କେନ୍ଦ୍ରାପଡ଼ା ଓ ମୟୂରଭଞ୍ଜ ଲୋକସଭା ଆସନରେ ମତଦାନ ହେବ।
ଓଡ଼ିଶା ଇଲେକ୍ସନ ୱାଚ୍ ଏବଂ ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ (ଏଡିଆର) ୬ଟି ଲୋକସଭା ନିର୍ବାଚନ ମଣ୍ଡଳୀରେ ପ୍ରତିଦ୍ୱନ୍ଦ୍ୱିତା କରୁଥିବା ସମସ୍ତ ୬୬ ଜଣ ପ୍ରାର୍ଥୀଙ୍କ ସତ୍ୟପାଠକୁ ବିଶ୍ଳେଷଣ କରିଛନ୍ତି।
୬୬ ଜଣ ପ୍ରାର୍ଥୀଙ୍କ ମଧ୍ୟରୁ ୨୦ ଜଣ (୩୦ ପ୍ରତିଶତ) ପ୍ରାର୍ଥୀଙ୍କ ସମ୍ପତ୍ତି ୧ କୋଟିଟଙ୍କାରୁ ଅଧିକ ରହିଛି। ଲୋକସଭା ନିର୍ବାଚନର ଶେଷ ପର୍ଯ୍ୟାୟରେ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀଙ୍କ ହାରାହାରି ସମ୍ପତ୍ତି ହେଉଛି ୩.୮୩ କୋଟି ଟଙ୍କା।
ପ୍ରମୁଖ ଦଳଗୁଡ଼ିକ ମଧ୍ୟରେ ପ୍ରତି ବିଜେପି ପ୍ରାର୍ଥୀଙ୍କ ହାରାହାରି ସମ୍ପତ୍ତି ୨୭.୧୨ କୋଟି ଟଙ୍କା ଥିବା ବେଳେ ବିଜେଡିର ୬ ଜଣ ପ୍ରାର୍ଥୀଙ୍କ ହାରାହାରି ସମ୍ପତ୍ତି ୬.୬୧ କୋଟି ଟଙ୍କା, ୫ ଜଣ କଂଗ୍ରେସ ପ୍ରାର୍ଥୀଙ୍କ ହାରାହାରି ସମ୍ପତ୍ତି ୨.୩୭ କୋଟି ଟଙ୍କା ରହିଛି।
ଏହି ପର୍ଯ୍ୟାୟ ନିର୍ବାଚନରେ କେନ୍ଦ୍ରାପଡ଼ା ଲୋକସଭା ଆସନପାଇଁ ବିଜେପି ପ୍ରାର୍ଥୀ ବୈଜୟନ୍ତ ପଣ୍ଡା ୧୪୮.୦୮ କୋଟି ଟଙ୍କାର ସମ୍ପତ୍ତି ସହ ସବୁଠାରୁ ଧନୀ ପ୍ରାର୍ଥୀ ହୋଇଥିବା ବେଳେ କେନ୍ଦ୍ରାପଡ଼ା ନିର୍ବାଚନମଣ୍ଡଳୀର ସ୍ୱାଧୀନ ପ୍ରାର୍ଥୀ ଶ୍ରୀରାମ ପାଣ୍ଡେ (୧୮.୨୩ କୋଟି) ଏବଂ ଭଦ୍ରକରୁ ବର୍ତ୍ତମାନର ବିଜେପି ସାଂସଦ ମଞ୍ଜୁଲତା ମଣ୍ଡଳ (୧୪.୮୬ କୋଟି) ତୃତୀୟ ସ୍ଥାନରେ ରହିଛନ୍ତି।
ସର୍ବନିମ୍ନ ସମ୍ପତ୍ତି ଥିବା ୩ ଜଣ ପ୍ରାର୍ଥୀ ହେଲେ ଜଗତସିଂହପୁର ଲୋକସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଥିବା ଉତ୍କଳ ସମାଜ ପାର୍ଟିର ଭାନୁମତୀ ଦାସ (୧୫୦୦ ଟଙ୍କା), ବାଲେଶ୍ୱରରୁ ସ୍ୱାଧୀନ ପ୍ରାର୍ଥୀ ଦୀପକ ଶଙ୍କର ଠାକୁର ଗିରି (୬,୦୦୦ ଟଙ୍କା) ଏବଂ ଜଗତସିଂହପୁର ଲୋକସଭା ଆସନରୁ ବିଏସପି ପ୍ରାର୍ଥୀ ବିଭୂତି ଭୂଷଣ ମାଝୀ (୬,୦୬୧ ଟଙ୍କା)।
ଏଡିଆର ଏହା ମଧ୍ୟ ପ୍ରକାଶ କରିଛି ଯେ ୧୫ (୨୩ ପ୍ରତିଶତ) ପ୍ରାର୍ଥୀ ନିଜ ବିରୋଧରେ ଅପରାଧିକ ମାମଲା ଘୋଷଣା କରିଛନ୍ତି, ସେମାନଙ୍କ ମଧ୍ୟରୁ ୧୦ ଜଣ ଗୁରୁତର ଅପରାଧିକ ମାମଲାର ସମ୍ମୁଖୀନ ହେଉଛନ୍ତି।
୧୯ ଜଣ ସାଂସଦ ପ୍ରାର୍ଥୀ ସେମାନଙ୍କର ଶିକ୍ଷାଗତ ଯୋଗ୍ୟତା ପଞ୍ଚମରୁ ଦ୍ୱାଦଶ ଶ୍ରେଣୀ ମଧ୍ୟରେ ବୋଲି ଘୋଷଣା କରିଥିବା ବେଳେ ୪୩ ଜଣ ସ୍ନାତକ କିମ୍ବା ତା’ଠାରୁ ଅଧିକ। ଏହାବ୍ୟତୀତ ୨ ଜଣ ପ୍ରାର୍ଥୀ ଡିପ୍ଲୋମା ଧାରୀ ହୋଇଥିବା ବେଳେ ୨ ଜଣ ପ୍ରାର୍ଥୀ ନିଜକୁ କେବଳ ସାକ୍ଷର ବୋଲି ଘୋଷଣା କରିଛନ୍ତି।
ରିପୋର୍ଟରେ ଆହୁରି କୁହାଯାଇଛି ଯେ ୧୪ ଜଣ ପ୍ରାର୍ଥୀ ସେମାନଙ୍କ ବୟସ ୨୫ରୁ ୪୦ ବର୍ଷ ମଧ୍ୟରେ ଘୋଷଣା କରିଥିବା ବେଳେ ୩୪ ଜଣ ପ୍ରାର୍ଥୀ ୪୧ରୁ ୬୦ ବର୍ଷ ବୟସ ବର୍ଗର ବୋଲି ଘୋଷଣା କରିଛନ୍ତି। ୧୮ ଜଣ ବରିଷ୍ଠ ପ୍ରାର୍ଥୀ ସେମାନଙ୍କ ବୟସ ୬୧ରୁ ୮୦ ବର୍ଷ ମଧ୍ୟରେ ବୋଲି ଘୋଷଣା କରିଛନ୍ତି।