Home News in Odia ୧୦୩୭ କୋଟିର ଗଞ୍ଜେଇ ଗଛ ନଷ୍ଟ

୧୦୩୭ କୋଟିର ଗଞ୍ଜେଇ ଗଛ ନଷ୍ଟ

ଭୁବନେଶ୍ୱର : ରାଜ୍ୟ ଅବକାରୀ ବିଭାଗ ଚଳିତ ବର୍ଷ ନଭେମ୍ବର ଶେଷ ସୁଦ୍ଧା ଚଢଉ କରି ୧୦୩୭କୋଟି ଟଙ୍କାରୁ ଉର୍ଦ୍ଧ୍ୱ ମୂଲ୍ୟର ଗଞ୍ଜେଇ ଗଛ ନଷ୍ଟ କରିସାରିଲେଣି । ରାଜ୍ୟର ୭ଟି ଜିଲ୍ଲାରେ ୮୬୮୬ ଏକର ଜମିରେ ଥିବା ଏହି ଗଞ୍ଜେଇ ଗଛକୁ ନଷ୍ଟ କରାଯାଇଛି ।

ରାଜ୍ୟରେ ଅବକାରୀ ବିଭାଗର କାର୍ଯ୍ୟାନୁଷ୍ଠାନ ସଂକ୍ରାନ୍ତରେ ଅବକାରୀ କମିଶନର ଆଶିଷ କୁମାର ସିଂହ ଆଜି କରିଥିବା ସମୀକ୍ଷାରୁ ଏହା ଜଣାପଡିଛି । ଏତେ ବିପୁଳ ପରିମାଣର ଗଞ୍ଜେଇ ଗଛ ନଷ୍ଟ ସହିତ ଅବକାରୀ ବିଭାଗ ପକ୍ଷରୁ ଗତ ୧୧ମାସ ମଧ୍ୟରେ ଜବତ ବିଭିନ୍ନ ପ୍ରକାର ନିଶା ସାମଗ୍ରୀ ଓ ଗାଡିମୋଟର ମୂଲ୍ୟ ୮୯କୋଟି ଟଙ୍କା ହେବ ବୋଲି ଆକଳନ କରାଯାଇଛି ।

ଅବକାରୀ କମିଶନର କରିଥିବା ସମୀକ୍ଷାରୁ ଜଣାଯାଇଛି ଯେ ରାଜ୍ୟର ୭ଟି ଜିଲ୍ଲା ବୌଦ, ଗଜପତି, କଳାହାଣ୍ଡି, କନ୍ଧମାଳ, କୋରାପୁଟ, ମାଲକାନଗିରି ଓ ନବରଙ୍ଗପୁର ଜିଲ୍ଲାରୁ ବିଭାଗ ବିପୁଳ ପରିମାଣର ଗଞ୍ଜେଇ ଗଛ ନଷ୍ଟ କରିଛି । ଏହିସବୁ ଜିଲ୍ଲାରେ ୮୬୮୬ ଏକର ଜମିରେ ଥିବା ୧,୦୩,୭୪,୫୭୩ଟି ଗଞ୍ଜେଇ ଗଛ ନଷ୍ଟ କରାଯାଇଛି ଯାହାର ଆନୁମାନିକ ମୂଲ୍ୟ ୧୦୩୭,୪୫,୭୩,୦୦୦ ଟଙ୍କା ହେବ ।

ସବୁଠାରୁ ଅଧିଖକ ୫୩ଲକ୍ଷ ୨୧ହଜାର ଗଞ୍ଜେଇ ଗଛ କନ୍ଧମାଳ ଜିଲ୍ଲାରେ ନଷ୍ଟ କରାଯାଇଥିବାବେଳେ ମାଲକାନଗିରିରେ ୩୨,୭୩,୭୦୦ ଗଛ, ଗଜପତିରେ ୧୪,୪୪,୪୮୦, କେରାପୁଟରେ ୨,୭୫,୮୯୦, ରାୟଗଡାରେ ୪୩,୦୦୦, ବୌଦରେ ୧୬,୨୫୦ ଓ କଳାହାଣ୍ଡି ଜିଲ୍ଲାରେ ମାତ୍ର ୨୫୩ଟି ଗଞ୍ଜେଇ ଗଛ ନଷ୍ଟ ହୋଇଛି ।

ସେହିଭଳି ଅବକାରୀ ବିଭାଗ ଗତ ୧୧ମାସ ମଧ୍ୟରେ କରିଥିବା ବ୍ୟାପକ ଚଢଉ ସମୟରେ ୨୫,୫୩୪ଟି ମାମଲା ରୁଜୁ ହୋଇଥିାବବେଳେ ୧୯,୩୯୫ ଜଣ ବ୍ୟକ୍ତି ଗିରଫ ହୋଇଛନ୍ତି । ଏହି ସମୟରେ ବିଭାଗ ପକ୍ଷରୁ ସମଗ୍ର ରାଜ୍ୟରେ ୫୦୪୦ ଲିଟର ନକଲି ବିଦେଶୀ ମଦ, ୧୮୨୨ ଲିଟର ଟିକସ ଫାଙ୍କି ହୋଇଥିବା ବିଦେଶୀ ମଦ, ୩୪୫୭ଲିଟର ସ୍ପିରିଟ୍‍, ୧୬,୯୪୩ କିଲୋ ଗଞ୍ଜେଇ, ୭.୬ କିଲୋ ଅଫିମ, ୮୫୮୦ଗ୍ରାମ ବ୍ରାଉନସୁଗାର, ୫୧୯ ଲିଟର କଫ ସିରପ ଜବତ ହୋଇଛି । ଏହି କାରବାରରେ ସମ୍ପୃକ୍ତି ବ୍ୟକ୍ତିଙ୍କ ଠାରୁ ୧୪୦୬ଟି ଗାଡିମୋଟର ଜବତ ହୋଇଥିବାବେଳେ ଏଥି ମଧ୍ୟରେ ଦୁଇଚକିଆ, ତିନି ଚକିଆ, କାର୍‍ ଓ ଟ୍ରକ ଆଦି ଯାନ ରହିଛି ।

ଭର୍ଚୁଆଲ ବ୍ୟବସ୍ଥାରେ ଜିଲ୍ଲା ଅବକାରୀ ସୁପରିଟେଣ୍ଡଣ୍ଟମାନଙ୍କ ସହିତ ହୋଇଥିବା ଏହି ସମୀକ୍ଷା ବୈଠକରେ ଅବକାରୀ କମିଶନର ଚଢାଉକୁ ଆହୁରି ବ୍ୟାପକ କରିବାପାଇଁ କମିଶନର ନିର୍ଦ୍ଦେଶ ଦେଇଛନ୍ତି । ରାଜ୍ୟରେ ଯେଭଳି କୌଣସି ନକଲି କିମ୍ବା ଟିକସଫାଙ୍କି ବିଦେଶୀ ମଦ କାରବାର ନହୁଏ ତାହା ଉପରେ କଡା ନଜର ରଖିବାପାଇଁ ଅବକାରୀ ସୁପରିଟେଣ୍ଡଣ୍ଟମାନଙ୍କୁ କୁହାଯାଇଛି । ସେହିଭଳି ବେଆଇନ୍‍ ନିଶାକାରର ମୂଳୋତ୍ପାଟନ ସହିତ ଗଞ୍ଜେଇ ଓ ବ୍ରାଉନସୁଗାର ବିରୁଦ୍ଧରେ ସ୍ୱତନ୍ତ୍ର ଅଭିଯାନ ଚଳାଇବାକୁ ନିର୍ଦ୍ଦେଶ ଦିଆଯାଇଛି ।

ବିଦେଶୀ ମଦ ଦୋକାନଗୁଡିକରେ ଯେଭଳି ୫-ଟି ନିୟମ କଡାକଡି ଭାବେ କାର୍ଯ୍ୟକାରୀ ହେବ ତାହା ନିଶ୍ଚିତ କରିବାକୁ ଅବକାରୀ କମିଶନର କହିଛନ୍ତି । ପ୍ରତି ସପ୍ତାହରେ ସବଇନ୍ସପେକ୍ଟରମାନେ ମଦ ଦୋକାନର ଅନୁଧ୍ୟାନ କରିବା ସହିତ ୧୫ ଦିନରେ ଥିରେ ଇନ୍ସପେକ୍ଟର ଓ ଅବକାରୀ ସୁପରିଟେଣ୍ଡଣ୍ଟମାନେ ମାସିକ ଅନୁଧ୍ୟାନ କରି ନିର୍ଦ୍ଦେଶାଳୟକୁ ରିପୋର୍ଟ ପ୍ରଦାନ କରିବେ । ବିଭିନ୍ନ ମଦର ନମୂନା ସଂଗ୍ରହ ସହିତ ଏହାର ପରୀକ୍ଷା ପାଇଁ ମଧ୍ୟ କୁହାଯାଇଛି ।

ଗଞ୍ଜେଇ ଚାଷ ହେଉଥିବା ଜିଲ୍ଲାଗୁଡିକ ଉପରେ ସ୍ୱତନ୍ତ୍ର ନଜର ସହିତ ଏହାକୁ ସମୂଳେ ନଷ୍ଟ କରିବା ଏବଂ ଏହି ଚାଷରେ କେଉଁ କେଉଁମାନେ ଜଡିତ ଅଛନ୍ତି ତାହାର ସୂଚନା ସଂଗ୍ରହ କରି ସେମାନଙ୍କ ବିରୁଦ୍ଧରେ ମାମଲା ରୁଜୁ ପାଇଁ ଅବକାରୀ କମିଶନର ଶ୍ରୀ ସିଂହ ସ୍ପଷ୍ଟ ନିର୍ଦ୍ଦେଶ ଜାରି କରିଛନ୍ତି । (ତଥ୍ୟ)

LEAVE A REPLY

Please enter your comment!
Please enter your name here