Home Health ସମରେ ଜଟିଳ ହୃଦରୋଗର ସଫଳ ଅସ୍ତ୍ରୋପଚାର

ସମରେ ଜଟିଳ ହୃଦରୋଗର ସଫଳ ଅସ୍ତ୍ରୋପଚାର

ଭୁବନେଶ୍ୱର : ଜନ୍ମରୁ ଜଟିଳ ହୃଦରୋଗରେ ପୀଡିତ ଥିବା ମହିଳାଙ୍କର ଅସ୍ତ୍ରୋପଚାର କରି ତାକୁ ସୁସ୍ଥ କରିବାରେ ସଫଳ ହୋଇ ପାରିଛନ୍ତି ସମ୍ ହସ୍ପିଟାଲର ଡାକ୍ତର । ଜଟିଳ ହୃଦରୋଗ କୋଆର୍କଟେସନ ଅଫ ଆଓର୍ଟା ଭଳି ସମସ୍ୟାରେ ପୀଡିତ ଥିବା ଯାଜପୁର ଅଂଚଳର ୩୪ ବର୍ଷିୟା ଏହି ମହିଳାଙ୍କର ବିରଳ ଅସ୍ତ୍ରୋପଚାର କରିଛନ୍ତି ଇନଷ୍ଟିଚ୍ୟୁଟ୍ ଅଫ ମେଡିକାଲ ସାଇନସେସ୍ ଆଣ୍ଡ ସମ୍ ହସ୍ପିଟାଲର କାର୍ଡିଆକ ସାଇନସେସ୍ ବିଭାଗର ଯୁବ କାର୍ଡିଓଲୋଜିଷ୍ଟ ଡ. ଦିବ୍ୟରଞ୍ଜନ ବେହେରା ।

ଏହି ମହିଳା ଜଣକ ଦୀର୍ଘ ଦିନ ଧରି ଉଚ୍ଚ ରକ୍ତଚାପ ରୋଗରେ ପୀଡିତ ଥିଲେ । ଏଥି ନିମନ୍ତେ ସେ ଦୈନିକ ଚାରି ରୁ ପାଂଚ ପ୍ରକାର ଔଷଧ ସେବନ କରୁଥିଲେ ମଧ୍ୟ ତାଙ୍କ ରକ୍ତ ଚାପ ନିୟନ୍ତ୍ରଣରେ ରହୁନଥିଲା । ଅନେକ ସ୍ଥାନରେ ଚିକିତ୍ସା କରାଇବା ପରେ ସେ ସମ୍ ହସ୍ପିଟାଲକୁ ଆସି ଡ. ବେହେରାଙ୍କ ଅଧିନରେ ଚିକିତ୍ସା ଆରମ୍ଭ କରିଥିଲେ ।

ପରୀକ୍ଷା ନିରୀକ୍ଷା ପରେ ସେ କୋଆର୍କଟେସନ ଅଫ ଆଓର୍ଟା ପରି ଜଟିଳ ହୃଦରୋଗରେ ପୀଡିତ ଥିବାର ଜଣାପଡ଼ିଥିଲା । ପ୍ରାୟ ଜନ୍ମ ସମୟରୁ ରୋଗୀର ଶରୀରରେ ଏହି ସମସ୍ୟା ଦେଖା ଯାଉଥିବାବେଳେ ଆଓର୍ଟା, ଯାହାକି ଶରୀରର ମୁଖ୍ୟ ଧମନୀ ଭାବେ କାର୍ଯ୍ୟ କରିଥାଏ ଓ ହୃତପିଣ୍ଡରୁ ସମଗ୍ର ଶରୀରରେ ଅମ୍ଳଜାନ ସଂଚାର କରିଥାଏ, ତାହା ସଙ୍କୁଚିତ ହୋଇଯାଇଥାଏ । ଏହା ଫଳରେ ରୋଗୀ ଉଚ୍ଚ ରକ୍ତଚାପ, ବ୍ରେନ ହେମରେଜ୍ ଓ କିଡ୍‌ନୀ ସମସ୍ୟାରେ ଆକ୍ରାନ୍ତ ହେବା ସହ ଦୁଇ ଗୋଡରେ ମଧ୍ୟ ଯନ୍ତ୍ରଣା ଅନୁଭବ କରେ ବୋଲି ଡ. ବେହେରା କହିଛନ୍ତି ।

ଡ. ବେହେରାଙ୍କ ପ୍ରତ୍ୟକ୍ଷ ତତ୍ୱାବଧାନରେ ଏକ ବିଶେଷଜ୍ଞ ଟିମ୍ ସମ୍ ହସ୍ପିଟାଲର କ୍ୟାଥ୍ ଲ୍ୟାବରେ ଏହି ଜଟିଳ ଅସ୍ତ୍ରୋପଚାର କରିଥିଲେ । ଷ୍ଟେଂଟିଙ୍ଗ ମାଧ୍ୟମରେ ସଙ୍କୁଚିତ ମୁଖ୍ୟ ଧମନୀକୁ ଖୋଲି ଦିଆଯାଇ ସ୍ୱାଭାବିକ ଅବସ୍ଥାକୁ ଅଣାଯାଇଥିଲା ଯାହାଦ୍ୱାରା ଶରୀରର ରକ୍ତ ପ୍ରବାହ ପ୍ରକ୍ରିୟା ସ୍ୱାଭାବିକ ଅବସ୍ଥାକୁ ଫେରି ଆସିଥିଲା ।

ରୋଗୀଟି ଏବେ ସମ୍ପୂର୍ଣ୍ଣ ସୁସ୍ଥ ଥିବା ସହ ତାଙ୍କୁ ଆଉ ଉଚ୍ଚ ରକ୍ତଚାପର ଔଷଧ ସେବନ କରିବାକୁ ପଡୁ ନାହିଁ । ରୋଗୀଙ୍କର ସମ୍ପୂର୍ଣ୍ଣ ଚିକିତ୍ସା ଖର୍ଚ୍ଚ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ଅନ୍ତର୍ଭୁକ୍ତ କରାଯାଇଥିଲା ।

LEAVE A REPLY

Please enter your comment!
Please enter your name here