Home General ମାନବିକ ଆଚରଣ ଆତଙ୍କବାଦୀକୁ ପରିବର୍ତନ କରିପାରେ

ମାନବିକ ଆଚରଣ ଆତଙ୍କବାଦୀକୁ ପରିବର୍ତନ କରିପାରେ

ଭୁବନେଶ୍ୱର : ମାନବିକ ଆଚରଣ ମନୁଷ୍ୟର ହୃଦୟକୁ ପରିବର୍ତନ କରିବା ନିମନ୍ତେ ଏକ ଶାଣିତ ଅସ୍ତ୍ର । ଏହା ଜଣେ ଆତଙ୍କବାଦୀଙ୍କୁ ମଧ୍ୟ ପରିବର୍ତନ କରିବାକୁ ସମର୍ଥ ।

ପାକିସ୍ତାନରେ ଦୁଇବର୍ଷ ତାଲିମ ପାଇବା ପରେ କାଶ୍ମୀରର ଜଣେ ଯୁବକ ଆତଙ୍କବାଦୀ ସଂଗଠନ ହୁଜିରେ ଯୋଗ ଦେଇଥିଲେ । ଅବିଶ୍ୱାସ୍ୟ ମନେ ହେଲେ ମଧ୍ୟ ୨୦୦୧ ଡିସେମ୍ବର ମାସରେ ସେନାବାହିନୀ ଦ୍ୱାରା ଅନନ୍ତନାଗ ଜିଲ୍ଲାରେ ଧରା ପଡ଼ିଥିବା ଏହି ଯୁବକ ଆଜି ସ୍ଥଳବାହିନୀରେ ହାବିଲଦାର ଭାବେ କାର୍ଯ୍ୟ କରୁଛନ୍ତି ।

ଏହି ବିଷୟ ବର୍ଣ୍ଣନା କରିଛନ୍ତି ସେନାବାହିନୀର ଅବସରପ୍ରାପ୍ତ ଅଫିସର ମେଜର ଜେନେରାଲ୍ ଜସ୍‌ପାଲ୍ ମୋର ।

ଋବିବାର ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟରେ ଅନୁଷ୍ଠିତ ଟେଡ୍‌ଏକ୍ସ କାର୍ଯ୍ୟକ୍ରମରେ ଯୋଗ ଦେଇ ମେଜର ଜେନେରାଲ୍ ମୋର ନିଜର ବ୍ୟକ୍ତିଗତ ଅଭିଜ୍ଞତାରୁ ଆତଙ୍କବାଦୀଙ୍କର ଏହି ପରିବର୍ତନ ବିଷୟରେ ବର୍ଣ୍ଣନା କରିଥିଲେ ।

କିସ୍ତୱାର ଅଂଚଳର ଏହି ଯୁବକ ସେନା ସହିତ ଏକ ମୁକାବିଲାରେ ଗୋଡରେ ବୁଲେଟ୍ ଆଘାତ ପାଇଥିଲେ । ପରେ ତାଙ୍କୁ ଏକ ଦୁର୍ଗମ ଅଂଚଳ ମଧ୍ୟ ଦେଇ ଅନ୍ୟ ମିଲିଟାଂଟମାନେ ଅନନ୍ତନାଗକୁ ନେଇ ଆସିଥିଲେ ସେନାବାହିନୀ ଦ୍ୱାରା ଧରାପଡ଼ିବା ପରେ ସେ ନିଶ୍ଚୟ ଭାବି ଥିବେ ଯେ ତାଙ୍କୁ ମାରି ଦିଆଯିବ । ଆତଙ୍କବାଦୀଙ୍କ ଧରାପଡ଼ିବା ବିଷୟ ସେନା ବିଭାଗ ଓ ପୋଲିସକୁ ଜଣାଇ ଦିଆଯିବା ପରେ ତାଙ୍କୁ ପଚରା ଉଚରା ପାଇଁ ଶ୍ରୀନଗରକୁ ନିଆଯାଇଥିଲା । ମାତ୍ର ଅଳ୍ପଦିନ ପରେ ତାଙ୍କୁ ପୁଣି ଅନନ୍ତନାଗ ପଠାଇ ଦିଆଗଲା ।

ମେଜର ଜେନେରାଲ୍ ମୋର ସେତେବେଳେ ଅନନ୍ତନାଗରେ ରାଷ୍ଟ୍ରୀୟ ରାଇଫଲ୍ସର କମ୍ପାନୀ କମାଣ୍ଡର ଭାବେ ଅବସ୍ଥାପିତ ହୋଇଥିଲେ । “ମୁଁ ସେହି ଯୁବକଙ୍କଠାରୁ ତାଙ୍କ ଜୀବନ କାହାଣୀ ଶୁଣିବାକୁ ଚାହିଁଥିଲି ଓ ସେ ମଧ୍ୟ ସବୁ ବିଷୟ ମୋତେ ଜଣାଇଲେ । ଧିରେ ଧିରେ ଆମ ଦୁଇ ଜଣଙ୍କର ବନ୍ଧୁତ୍ୱ ବଢ଼ିଲା” ମେଜର ଜେନେରାଲ୍ ମୋର କହିଲେ ।

ଆହତ ଆତଙ୍କବାଦୀଙ୍କ ଚିକିତ୍ସା କରାଯିବାରୁ ସେ କ୍ରମଶଃ ସୁସ୍ଥତା ଲାଭ କଲେ । ମାତ୍ର ତାଙ୍କ ପିତାମାତାଙ୍କ ନିମନ୍ତେ ସେ ଅଧିକ ଚିନ୍ତିତ ହେଉଥିଲେ କାରଣ ସେମାନେ ପୁଅ ନିଶ୍ଚିତ ଭାବେ ମୃତ୍ୟୁବରଣ କରିଛି ବୋଲି ଭାବିଥିବେ ।

ଅଫିସର ତାଙ୍କୁ ପିତାଙ୍କ ନିକଟକୁ ଚିଠି ଲେଖି ସେ ସେନାବାହିନୀ ଦ୍ୱାରା ଧୃତ ହେବା ପରେ ସୁରକ୍ଷିତ ଅଛନ୍ତି ବୋଲି ଜଣାଇବାକୁ କହିଲେ । ଚିଠି ପାଇ ବାପା ପୁଅକୁ ଦେଖିବା ପାଇଁ ଧାଇଁ ଆସିଲେ । ପିତା ପୁତ୍ରଙ୍କର ମିଳନ ଏକ ହୃଦୟସ୍ପର୍ଶୀ ଦୃଶ୍ୟ ଥିଲା ବୋଲି ମେଜର ଜେନେରାଲ୍ ମୋର କହିଥିଲେ । “ଦିନେ କଥାବାର୍ତା ହେବା ବେଳେ ଏହି ଯୁବକ ମେଜର ଜେନେରାଲ୍ ମୋରଙ୍କୁ କହିଲେ ଯେ ଭାରତୀୟ ସେନା ବାହିନୀ ବିଷୟରେ ଆତଙ୍କବାଦୀ ଭାବେ ତାଲିମ ନେବା ବେଳେ ତାଙ୍କୁ ଯାହା କୁହାଯାଇଥିଲା ତାହା ସମ୍ପୂର୍ଣ୍ଣ ଭୁଲ୍ ଥିଲା ।”

ସୁସ୍ଥତା ପାଇବା ପରେ ତାଙ୍କୁ ଆର୍ମି କ୍ୟାମ୍ପର ରୋଷେଇ ଘରେ କାର୍ଯ୍ୟ କରିବା ନିମନ୍ତେ କୁହାଗଲା । ପରବର୍ତୀ କାଳରେ ସେ ସେନା ବାହିନୀରେ ଯୋଗ ଦେଇ ଏବେ ହାବିଲଦାର ଭାବେ କାର୍ଯ୍ୟ କରୁଛନ୍ତି । ସେ ବିବାହ କରିଛନ୍ତି ଓ କିସ୍ତୱାରରେ ଏକ ଘର ତିଆରି କରିଛନ୍ତି । ଅନ୍ୟମାନଙ୍କ ପ୍ରତି ମାନବିକ ଆଚରଣ କଲେ ଏହା ସେମାନଙ୍କ ଜୀବନ ଉପରେ ଏକ ସକାରାତ୍ମକ ପ୍ରଭାବ ପକାଇଥାଏ ବୋଲି ସେ କହିଛନ୍ତି ।

ଏହି ଟେଡଏକ୍ସ କାର୍ଯ୍ୟକ୍ରମକୁ ଶିକ୍ଷା ଓ ଅନୁସନ୍ଧାନର ଉପସଭାପତି ଶ୍ରୀମତି ଶାଶ୍ୱତୀ ଦାସ ଉଦ୍‌ଘାଟନ କରିଥିଲେ । ଏହା ପୂର୍ବରୁ ଶ୍ରୀମତି ଦାସ ବିଶ୍ୱବିଦ୍ୟାଳୟ ଅଧୀନରେ ଥିବା କୃଷି ମହାବିଦ୍ୟାଳୟରେ ଏକ ୫୦୦ ଆସନ ବିଶିଷ୍ଟ ଆଧୁନିକ ପ୍ରେକ୍ଷାଳୟକୁ ମଧ୍ୟ ଉଦ୍‌ଘାଟନ କରିଥିଲେ ।

ଏହି କାର୍ଯ୍ୟକ୍ରମରେ ବଲିଉଡ୍ ଗୀତିକାର କୁମାର, ସଂଗୀତ ସଂଯୋଜକ ନିଲେଶ ଆହୁଜା, ରେଡିଓ ଜକି ରାଘବ, ଫିଲାନ୍ତ୍ରୋପିଷ୍ଟ ଅକ୍ଷିତା ଏମ୍‌. ଭଞ୍ଜଦେଓ, ଇନ୍‌ଫ୍ଲୁଏନ୍ସର ଫର୍ ଗ୍ଲୋବାଲ୍ ଡେଭଲପ୍‌ମେଂଟ ଗୋଲ୍ସ କମଲ ପ୍ରସାଦ ସେଠ ଓ ପେନ୍ସିଲ୍ ଫର୍ ଚେଞ୍ଜର ପ୍ରତିଷ୍ଠାତା ପଟ୍ଟନାୟକ ଓମ୍‌ପ୍ରୀୟ ମହାନ୍ତି ମଧ୍ୟ ଯୋଗ ଦେଇଥିଲେ ।

LEAVE A REPLY

Please enter your comment!
Please enter your name here