ଭୁବନେଶ୍ୱର : ୨୦୨୪-୨୫ ଆର୍ଥିକ ବର୍ଷ ପାଇଁ ବାର୍ଷିକ ବଜେଟ୍ ପ୍ରସ୍ତୁତି ଲାଗି ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିଛନ୍ତି, ଯାହା ୨୦୨୪ ଫେବ୍ରୁଆରୀରେ ବିଧାନସଭାରେ ଉପସ୍ଥାପିତ ହେବାର ସମ୍ଭାବନା ରହିଛି ।
ଅର୍ଥ ବିଭାଗର ପ୍ରମୁଖ ଶାସନ ସଚିବ ବିଶାଳ କୁମାର ଦେବ ବିଭାଗଗୁଡ଼ିକୁ ସେମାନଙ୍କ ବଜେଟ୍ ପ୍ରସ୍ତାବଗୁଡ଼ିକୁ ଶୀଘ୍ର ଏବଂ ବର୍ତ୍ତମାନର ଅର୍ଥନୈତିକ ସ୍ଥିତି ଅନୁଯାୟୀ ପ୍ରସ୍ତୁତ କରିବାକୁ ଏକ ନିର୍ଦ୍ଦେଶନାମା ଜାରି କରିଛନ୍ତି । ସମସ୍ତ ବିଭାଗକୁ ଆସନ୍ତା ଡିସେମ୍ବର ୧୫ ତାରିଖ ସୁଦ୍ଧା ପ୍ରସ୍ତାବ ଦାଖଲ କରିବାକୁ କୁହାଯାଇଛି । ରାଜ୍ୟ ସରକାରଙ୍କ ପ୍ରାଥମିକତା ହେଉଛି ନିରନ୍ତର ବିକାଶ ଲକ୍ଷ୍ୟ, ୨୦୩୦ ଏବଂ ଏହା ସହ ଜଡ଼ିତ ଲକ୍ଷ୍ୟ ଉପରେ ଗୁରୁତ୍ୱ ଦେବାକୁ ଶ୍ରୀ ଦେବ ବିଭାଗଗୁଡ଼ିକୁ କହିଛନ୍ତି ।
ଦାରିଦ୍ର୍ୟ ଦୂରୀକରଣ, ଅସମାନତା ଦୂରୀକରଣ, ମହିଳା ସଶକ୍ତୀକରଣ, ସମସ୍ତଙ୍କ ପାଇଁ ଉପଯୁକ୍ତ କାର୍ଯ୍ୟ ସହିତ ସ୍ଥାୟୀ, ଅନ୍ତର୍ଭୁକ୍ତ ଏବଂ ନିରନ୍ତର ଅର୍ଥନୈତିକ ଅଭିବୃଦ୍ଧି ପାଇଁ ପରିସ୍ଥିତି ସୃଷ୍ଟି କରିବା ଉପରେ ସରକାର ଗୁରୁତ୍ୱ ଦେଉଛନ୍ତି । ସ୍ୱାସ୍ଥ୍ୟସେବା, ଶିକ୍ଷା, ଦକ୍ଷତା ବିକାଶ, ପାନୀୟ ଜଳ ସୁବିଧା, ଜଳସେଚନ, ଗ୍ରାମୀଣ ଯୋଗାଯୋଗ, ପରିମଳ, କ୍ରୀଡ଼ା ଭିତ୍ତିଭୂମି ଏବଂ ସହରାଞ୍ଚଳ ନାଗରିକ ସୁବିଧା କ୍ଷେତ୍ରରେ ରାଜ୍ୟ ବିପୁଳ ପୁଞ୍ଜିନିବେଶ କରୁଛି । କ୍ଷୁଦ୍ର ଓ ମଧ୍ୟମ ଶିଳ୍ପର ଶିଳ୍ପ ବିବିଧତା ଏବଂ ପ୍ରୋତ୍ସାହନ ରାଜ୍ୟର ଏକ ଗୁରୁତ୍ୱପୂର୍ଣ୍ଣ କ୍ଷେତ୍ର ହୋଇ ରହିଛି ବୋଲି ପ୍ରମୁଖ ଶାସନ ସଚିବ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ମହିଳାଙ୍କ ସଶକ୍ତୀକରଣ ଏବଂ ଆର୍ଥିକ ଅନ୍ତର୍ଭୁକ୍ତୀକରଣ ସର୍ବଦା ସରକାରଙ୍କ ଗୁରୁତ୍ୱପୂର୍ଣ୍ଣ କ୍ଷେତ୍ର ଅଟେ ।
ଶ୍ରୀ ଦେବ ସ୍ପଷ୍ଟ କରିଛନ୍ତି ଯେ ୨୦୨୪-୨୫ ଆର୍ଥିକ ବର୍ଷ ପାଇଁ ବଜେଟ୍ ପ୍ରସ୍ତୁତି ବାର୍ଷିକ ବଜେଟ୍, ୨୦୨୩-୨୪ ପାଇଁ ଗ୍ରହଣ କରାଯାଇଥିବା ନୀତି ଉପରେ ଆଧାରିତ ହେବ, ଯେଉଁଥିରେ ଉନ୍ନତ ବଜେଟ୍ କ୍ୟାଲେଣ୍ଡର, ମାଇକ୍ରୋ-ବିତ୍ତୀୟ ପୂର୍ବାନୁମାନ ଏବଂ ବିଭାଗୀୟ ସୀମା (ଉଭୟ ପ୍ରଶାସନିକ ଏବଂ କାର୍ଯ୍ୟକ୍ରମ ଖର୍ଚ୍ଚ ପାଇଁ) ର ଉନ୍ନତ ସଙ୍କେତ ଅନ୍ତର୍ଭୁକ୍ତ । ବିଭାଗଗୁଡ଼ିକୁ ବ୍ୟାପକ ସୀମା ମଧ୍ୟରେ ବ୍ୟୟକୁ ପ୍ରାଥମିକତା ଦେବାକୁ ପଡ଼ିବ ।
ର୍ନିଦ୍ଧାରିତ ସୀମା ମଧ୍ୟରେ ବଜେଟ୍ ପ୍ରସ୍ତାବଗୁଡ଼ିକର ପୁଙ୍ଖାନୁପୁଙ୍ଖ ଯାଞ୍ଚ ଏବଂ ପ୍ରାଥମିକତା ପାଇଁ ବିଭାଗଗୁଡ଼ିକୁ ପର୍ଯ୍ୟାପ୍ତ ସମୟ ଦିଆଯିବ । ରାଜ୍ୟର ପ୍ରାଥମିକତା ଓ ଏସଡିଜି ଅନୁଯାୟୀ କ୍ଷେତ୍ରୀୟ ପ୍ରାଥମିକତା ଚିହ୍ନଟ କରିବାକୁ ପ୍ରମୁଖ ଶାସନ ସଚିବ ବିଭାଗଗୁଡ଼ିକୁ ପରାମର୍ଶ ଦେଇଛନ୍ତି । ବଜେଟ୍ ପ୍ରସ୍ତୁତି ପାଇଁ ଧାର୍ଯ୍ୟ ହୋଇଥିବା ଅସ୍ଥାୟୀ କାର୍ଯ୍ୟସୂଚୀ ଅନୁଯାୟୀ ଡିସେମ୍ବର ୧୫ ସୁଦ୍ଧା ସମସ୍ତ ବିଭାଗସେମାନଙ୍କୁ ଆକଳନ ଦାଖଲ କରିବାକୁ ପଡ଼ିବ ଏବଂ ଡିସେମ୍ବର ୧୬ରୁ ୩୧ ତାରିଖ ପର୍ଯ୍ୟନ୍ତ ପ୍ରାକ୍ ବଜେଟ୍ ପରାମର୍ଶ ବୈଠକ ଅନୁଷ୍ଠିତ ହେବୟ ।
ପ୍ରାକ୍ ବଜେଟ୍ ପରାମର୍ଶ ଏବଂ ୨୦୨୪-୨୫ କେନ୍ଦ୍ର ବଜେଟ୍ ପରେ ଆକଳନ ସଂଶୋଧନ ଫେବ୍ରୁଆରି ୩ରେ କରାଯିବ । ୨୦୨୪ ଫେବ୍ରୁଆରି ୪ରୁ ୬ ତାରିଖ ମଧ୍ୟରେ ମନ୍ତ୍ରିପରିଷଦ ପକ୍ଷରୁ ୨୦୨୪-୨୫ ଆର୍ଥିକ ବର୍ଷର ବାର୍ଷିକ ବଜେଟ୍ ଅନୁମୋଦନ ନିଆଯିବ । ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ଫେବ୍ରୁଆରି ଦ୍ୱିତୀୟ ସପ୍ତାହରେ ବଜେଟ୍ ଉପସ୍ଥାପନ କରିବାର ସମ୍ଭାବନା ରହିଛି । (ତଥ୍ୟ)