Home Environment କୋଭିଡ ଚିକିତ୍ସା ରାଜିନାମା ଅବଧି ବୃଦ୍ଧି

କୋଭିଡ ଚିକିତ୍ସା ରାଜିନାମା ଅବଧି ବୃଦ୍ଧି

କରୋନା ମୁକାବିଲା ପାଇଁ ଓଡିଶା ସରକାର ଯେଉଁ ସଂସ୍ଥାମାନଙ୍କ ସହ ରାଜିନାମା ସ୍ୱାକ୍ଷର କରିଥିଲେ ତାହାର ମିଆଦ ପୂରିଯିବା ପରେ ଏବେ ପୁଣି ଆଉଥରେ ସମୟସୀମାକୁ ଚଳିତବର୍ଷ ଶେଷ ପର୍ଯ୍ୟନ୍ତ ବଢାଇଛନ୍ତି । ଏହି ମର୍ମରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଦାୟିତ୍ୱରେ ଥିବା ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଜିଲ୍ଲାପାଳମାନଙ୍କୁ ପତ୍ର ଲେଖି ଜଣାଇଛନ୍ତି ।

ରାଜ୍ୟ ସରକାରଙ୍କ ବୈଷୟିକ କମିଟିର ସୁପାରିଶ ଆଧାରରେ ଏହି ସମୟସୀମା ବୃଦ୍ଧି କରାଯାଇଛି । ଏଠାରେ ଉଲ୍ଲେଖନୀୟ ଯେ କରୋନାର ମୁକାବିଲା ପାଇଁ ଓଡିଶା ସରକାର ଗତ ମାର୍ଚ୍ଚମାସରୁ ଆଗୁଆ ପଦକ୍ଷେପ ଗ୍ରହଣ କରି ରାଜ୍ୟର ସମସ୍ତ ସହରାଞ୍ଚଳ ଓ ପଞ୍ଚାୟତରେ ସଂଗରୋଧ କେନ୍ଦ୍ରମାନ ସ୍ଥାପନ କରିଥିଲେ । ଏହାଛଡା କୋଭିଡ କେୟାର ସେଣ୍ଟର ଓ ଅସ୍ଥାୟୀ କୋଭିଡ ହସ୍ପିଟାଲମାନ ମଧ୍ୟ ସବୁ ଜିଲ୍ଲାରେ ସ୍ଥାପନ କରାଯାଇଛି । ଏଥିପାଇଁ ବିଭିନ୍ନ ବେସରକାରୀ ସଂସ୍ଥା ସହ ରାଜ୍ୟ ସରକାର ବିଧିବଦ୍ଧ ଚୁକ୍ତିନାମା କରିଥିଲେ । କରୋନା ସଂକ୍ରମିତଙ୍କ ଚିକିତ୍ସାପାଇଁ ରାଜ୍ୟରେ କୋଭିଡ କେୟାର ସେଣ୍ଟରରେ ୧୨,୫୧୬, କୋଭିଡ ହସ୍ପିଟାଲରେ ୮୦୦୦ ଶଯ୍ୟା ରହିଥିବାବେଳେ ୧୫୧୯ଟି ଆଇସିୟୁ/ଏଚ୍‍ଡିୟୁ ଶଯ୍ୟା ଓ ୫୬୪ଟି ଭେଣ୍ଟିଲେଟର ରହିଛି ।

ପ୍ରଥମ ପର୍ଯ୍ୟାୟରେ ୩ମାସ ପାଇଁ ବିଭିନ୍ନ ସଂସ୍ଥା ସହ ରାଜ୍ୟ ସରକାର ଚୁକ୍ତି କରିଥିଲେ । କିନ୍ତୁ ପରେ କରୋନାର ସ୍ଥିତିକୁ ଆଖିଆଗରେ ରଖି ରାଜିନାମାର ସମୟସୀମା ଭିନ୍ନ ଭିନ୍ନ ପର୍ଯ୍ୟାୟରେ ଗତ ସେପ୍ଟେମ୍ବର ଶେଷ ପର୍ଯ୍ୟନ୍ତ ବଢାଯାଇଥିଲା । ଏହା ପରଠାରୁ କୋଭିଡ ହସ୍ପିଟାଲ ଗୁଡିକର ଚୁକ୍ତି ସମୟ ଆଉ ବଢିନଥିଲେ ବି ଏଠାରେ ରୋଗୀ ଚିକିତ୍ସା କିନ୍ତୁ ଅବ୍ୟାହତ ରହିଥିଲା ।

ବୈଷୟିକ କମିଟି ବିଭିନ୍ନ ଦିଗରୁ ଅନୁଶୀଳନ କରି ଚୁକ୍ତିନାମାର ସମୟସୀମା ବୃଦ୍ଧି ଲାଗି ରାଜ୍ୟ ସରକାରଙ୍କୁ ସୁପାରିଶ କରିବାପରେ ଜିଲ୍ଲା ପ୍ରଶାସନ ଓ ଅନ୍ୟ ସଂସ୍ଥାଗୁଡିକ ସହ ଯୋଗାଯୋଗ କରି ଶେଷରେ ଆସନ୍ତା ଡିସେମ୍ବର ଶେଷ ପର୍ଯ୍ୟନ୍ତ ଚୁକ୍ତିନାମାର ସମୟସୀମା ବଢାଇବାପାଇଁ ରାଜ୍ୟ ସରକାର ନୀତିଗତ ଭାବେ ନିଷ୍ପତ୍ତି ନେଇଛନ୍ତି ।

ତେବେ ପରିବର୍ତ୍ତିତ ଅବସ୍ଥାରେ ଏବେ ପ୍ରାୟ ୭୫ ପ୍ରତିଶତ କରୋନା ଆକ୍ରାନ୍ତ ଘରୋ ସଂଗରୋଧରେ ରହି ଚିକିତ୍ସିତ ହେଉଛନ୍ତି ଏବଂ ସେମାନଙ୍କୁ ସରକାରଙ୍କ ପକ୍ଷରୁ ଔଷଧ ସମେତ ଅନ୍ୟାନ୍ୟ ଡାକ୍ତରୀ ପରାମର୍ଶ ମାଗଣାରେ ଯୋଗାଇ ଦିଆଯାଉଛି । ଏହା ଫଳରେ କୋଭିଡ ଡାକ୍ତରଖାନା, କୋଭିଡ କେୟାର ସେଣ୍ଟର ଓ ସଂଗରୋଧ କେନ୍ଦ୍ର ଗୁଡିକରେ ପୂର୍ବଭଳି ଆଉ ଗହଳି ନାହିଁ । ଏମିତିକି ଆଉ କେତେକ ସମ୍ପନ୍ନ ଲୋକ ବେସରକାରୀ ଡାକ୍ତରଖାନାରେ ନିଜ ଖର୍ଚ୍ଚରେ ବି ଚିକିତ୍ସିତ ହେଉଛନ୍ତି ।

ଏଣୁ କେତେକ କ୍ଷେତ୍ରରେ ଆଇସିୟୁ, ଭେଣ୍ଟିଲେଟର ଠାରୁ ଆରମ୍ଭ କରି ଅସ୍ଥାୟୀ କୋଭିଡ ଡାକ୍ତରଖାନାଗୁଡିକର ଶଯ୍ୟା ଖାଲି ପଡୁଛି । ଯେଉଁଠି ଗତ ୨ସପ୍ତାହ ଧରି କୋଭିଡ ଚିକିତ୍ସାକେନ୍ଦ୍ର ଗୁଡିକରେ ୫୦ପ୍ରତିଶତରୁ ଅଧିକ ଶଯ୍ୟା ଖାଲି ପଡୁଛି ସେଗୁଡିକରେ ଶଯ୍ୟାସଂଖ୍ୟା ୫୦ ପ୍ରତିଶତ ହ୍ରାସ କରିବାପାଇଁ ସରକାର ନିଷ୍ପତ୍ତି ନେଇଛନ୍ତି । ତେବେ ଆଇସିୟୁ ଏବଂ ଡାଏଲିସିସ୍‍ ସମେତ ଅନ୍ୟାନ୍ୟ ଚିକିତ୍ସା ସୁବିଧା ପାଇଁ ପୂର୍ବ ଚୁକ୍ତିନାମାରେ ଯାହା ବ୍ୟବସ୍ଥା ଥିଲା ତାହା ବଳବତ୍ତର ରହିବ ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ ଜିଲ୍ଲା ପ୍ରଶାସନଗୁଡିକୁ ସୂଚନା ଦିଆଯାଇଛି ।  

LEAVE A REPLY

Please enter your comment!
Please enter your name here