ନୂଆଦିଲ୍ଲୀ : କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଜୁବିନ ଇରାନୀ ଆଜି ରାଜ୍ୟସଭାରେ କହିଛନ୍ତି ଯେ ଭାରତ ସରକାର ମିଶନ ବାତ୍ସଲ୍ୟ ଯୋଜନାରେ ଗତ ଓ ଚଳିତ ଆର୍ଥିକ ବର୍ଷରେ ଓଡ଼ିଶାକୁ ୬୩.୮୮ କୋଟିରୁ ଅଧିକ ଟଙ୍କା ପ୍ରଦାନ କରିଛନ୍ତି।
ବିଜେଡି ସାଂସଦ ନିରଞ୍ଜନ ବିଶି ଓ ସୁଲତା ଦେଓଙ୍କ ପ୍ରଶ୍ନର ଉତ୍ତର ଦେଇ କେନ୍ଦ୍ରମନ୍ତ୍ରୀ କହିଛନ୍ତି ଯେ କେନ୍ଦ୍ର ଓ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସରକାରଙ୍କ ମଧ୍ୟରେ ପୂର୍ବ ନିର୍ଦ୍ଧାରିତ ଖର୍ଚ୍ଚ ଭିତ୍ତିରେ କଠିନ ପରିସ୍ଥିତିରେ ଶିଶୁମାନଙ୍କର ଯତ୍ନ, ସୁରକ୍ଷା, ଥଇଥାନ ଏବଂ ପୁନର୍ଗଠନ ପାଇଁ ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ମାଧ୍ୟମରେ ମିଶନ ବାତ୍ସଲ୍ୟ ଯୋଜନା କାର୍ଯ୍ୟକାରୀ କରୁଛି।
ଏହି ଯୋଜନା ଅଧୀନରେ ଓଡ଼ିଶାର ଜିଲ୍ଲା ଶିଶୁ ସୁରକ୍ଷା ୟୁନିଟ୍ (ଡିସିପିୟୁ) ସମେତ ସିଧାସଳଖ ରାଜ୍ୟ/କେନ୍ଦ୍ରଶାସିତ ଅଞ୍ଚଳକୁ ପାଣ୍ଠି ପ୍ରଦାନ କରାଯାଏ। ଅର୍ଥ ମନ୍ତ୍ରଣାଳୟ ଦ୍ୱାରା ଜାରି ହୋଇଥିବା ସିଙ୍ଗଲ ନୋଡାଲ ଏଜେନ୍ସି (ଏସଏନଏ) ଗାଇଡଲାଇନ ଅନୁଯାୟୀ ଓଡ଼ିଶା ସମେତ ରାଜ୍ୟ/କେନ୍ଦ୍ରଶାସିତ ଅଞ୍ଚଳକୁ ପାଣ୍ଠି ପ୍ରଦାନ କରାଯାଏ, ଯାହାକୁ ପବ୍ଲିକ ଫାଇନାନ୍ସିଆଲ ମ୍ୟାନେଜମେଣ୍ଟ ସିଷ୍ଟମ (ପିଏଫଏମଏସ) ପୋର୍ଟାଲରେ ଏସଏନଏ ରିପୋର୍ଟ ମାଧ୍ୟମରେ ବିଭିନ୍ନ ସ୍ତରରେ ତଦାରଖ କରାଯାଏ ।
ମିଶନ ବାତ୍ସଲ୍ୟ ଅଧୀନରେ ଓଡ଼ିଶାକୁ ପାଣ୍ଠି ପ୍ରଦାନରେ ବିଳମ୍ବ ହେଉଛି କି ବୋଲି ସାଂସଦମାନେ ପଚାରିବାରୁ ଇରାନୀ କହିଥିଲେ, ଭାରତ ସରକାରଙ୍କ ପକ୍ଷରୁ ପାଣ୍ଠି ପ୍ରଦାନରେ କୌଣସି ବିଳମ୍ବ ହୋଇନାହିଁ।
ଗତ ଆର୍ଥିକ ବର୍ଷ (୨୦୨୨-୨୩) ରେ ରାଜ୍ୟ ସରକାରଙ୍କୁ ୩୭୫୫.୪୯ ଲକ୍ଷ ଟଙ୍କା ପ୍ରଦାନ କରାଯାଇଥିବା ବେଳେ ଚଳିତ ଆର୍ଥିକ ବର୍ଷରେ (୧୧.୧୨.୨୦୨୩ ସୁଦ୍ଧା) ୨୬୩୩.୨୧ ଲକ୍ଷ ଟଙ୍କା ପ୍ରଦାନ କରାଯାଇଛି।
କେନ୍ଦ୍ରମନ୍ତ୍ରୀ ଆହୁରି ସୂଚନା ଦେଇଛନ୍ତି ଯେ ଓଡ଼ିଶା ରାଜ୍ୟରେ ଗୋଟିଏ ରାଜ୍ୟ ଶିଶୁ ସୁରକ୍ଷା ସୋସାଇଟି (ଏସ୍ ସିପିଏସ୍), ଗୋଟିଏ ରାଜ୍ୟ ପୋଷ୍ୟ ସମ୍ବଳ ଏଜେନ୍ସି (ସାରା), ୩୦ ଡିସିପିୟୁ, ୩୧ ଶିଶୁ କଲ୍ୟାଣ କମିଟି (ସିଡବ୍ଲ୍ୟୁସି), ୩୪ ଜୁଭେନାଇଲ୍ ଜଷ୍ଟିସ୍ ବୋର୍ଡ (ଜେଜେବି), ୧୪୦ ଶିଶୁ ଯତ୍ନ ଅନୁଷ୍ଠାନ (ସିସିଆଇ), ସଂସ୍ଥାଗତ ଯତ୍ନ ଅଧୀନରେ ୪୧୫୩ ଶିଶୁ ଏବଂ ମିଶନ ବାତ୍ସଲ୍ୟ ଯୋଜନା ଅଧୀନରେ ୧୭୭୨ ଅଣ-ସଂସ୍ଥାଗତ ଯତ୍ନ ରହିଛି।
ଜୁଭେନାଇଲ ଜଷ୍ଟିସ୍ (ଶିଶୁମାନଙ୍କଯତ୍ନ ଓ ସୁରକ୍ଷା) ଆଇନ, ୨୦୧୫ର ଧାରା ୧୦୬ (୨୦୨୧ରେ ସଂଶୋଧିତ) ଅନୁଯାୟୀ, ଜେଜେ ଆଇନ, ୨୦୧୫ ଏବଂ ଏହା ଅଧୀନରେ ଥିବା ନିୟମଗୁଡ଼ିକର କାର୍ଯ୍ୟକାରିତା ସୁନିଶ୍ଚିତ କରିବା ପାଇଁ ପ୍ରତ୍ୟେକ ରାଜ୍ୟ ସରକାର ଙ୍କୁ ପିଲାଙ୍କ ସହ ଜଡ଼ିତ ମାମଲାର ଶୁଣାଣି କରିବା ପାଇଁ ପ୍ରତ୍ୟେକ ଜିଲ୍ଲା ପାଇଁ ଏକ ଡିସିପିୟୁ ଗଠନ କରିବାକୁ ପଡ଼ିବ।
ଡିସିପିୟୁଗୁଡ଼ିକ ଜିଲ୍ଲାରେ ଶିଶୁମାନଙ୍କ ସେବା ଯୋଗାଣ ଏବଂ ଯତ୍ନ ଏବଂ ସୁରକ୍ଷା ସୁନିଶ୍ଚିତ କରିବା ପାଇଁ ଜିଲ୍ଲାପାଳଙ୍କ ସାମଗ୍ରିକ ତତ୍ତ୍ୱାବଧାନରେ କାର୍ଯ୍ୟ କରନ୍ତି ।
ମିଶନ ବାତ୍ସଲ୍ୟ ଯୋଜନା ନିର୍ଦ୍ଦେଶାବଳୀ ଅନୁଯାୟୀ, ଡିସିପିୟୁରେ ଉପଲବ୍ଧ ମାନବ ସମ୍ବଳ ମଧ୍ୟରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ, ସୁରକ୍ଷା ଅଧିକାରୀ (ସଂସ୍ଥାଗତ ଯତ୍ନ), ସୁରକ୍ଷା ଅଧିକାରୀ ( ଅଣ-ସଂସ୍ଥାଗତ ଯତ୍ନ), ଆଇନ-କମ ପ୍ରୋବେସନ ଅଫିସର (ଏଲସିପିଓ), କାଉନସେଲର, ସାମାଜିକ କର୍ମୀ, ଆକାଉଣ୍ଟାଣ୍ଟ, ଡାଟା ଆନାଲିଷ୍ଟ, ଆସିଷ୍ଟାଣ୍ଟ-କମ-ଡାଟା ଏଣ୍ଟ୍ରି ଅପରେଟର ଏବଂ ଆଉଟରିଚ୍ ୱାର୍କର୍ସ ଅନ୍ତର୍ଭୁକ୍ତ। ବାତ୍ସଲ୍ୟ ଯୋଜନା ବୋଲି ସେ ଏକ ଲିଖିତ ବିବୃତିରେ କହିଛନ୍ତି।