Home News in Odia ଆୟୁଷ୍ମାନ ଭାରତ ପାଇଁ ବିଜେପି ସାଂସଦଙ୍କ ଦାବି

ଆୟୁଷ୍ମାନ ଭାରତ ପାଇଁ ବିଜେପି ସାଂସଦଙ୍କ ଦାବି

ଭୁବନେଶ୍ୱର : ଓଡିଶାରେ ଆୟୁଷ୍ମାନ ଭାରତ ଯୋଜନାକୁ କାର୍ଯ୍ୟକାରୀ ଲାଗି ରାଜ୍ୟର ସାଂସଦମାନେ ଦାବି କରିଛନ୍ତି । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ବିଜେପି ସାଂସଦ ଜୁଏଲ ଓରାମ, ପ୍ରତାପ ଷଡଙ୍ଗୀ, ସୁରେଶ ପୁଜାରୀ, ବସନ୍ତ ପଣ୍ଡା, ସଂଗୀତା ସିଂହଦେଓ, ଅପରାଜିତା ଷଡଙ୍ଗୀ, ନିତେଶ ଗଙ୍ଗଦେବ ପ୍ରମୁଖ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମନସୁଖ୍ ଲାଲ୍ ମାଣ୍ଡଭିୟଙ୍କୁ ସାକ୍ଷାତ କରି ଦାବୀପତ୍ର ପ୍ରଦାନ କରିଛନ୍ତି ।

ବିଜେପି ତାହାର ଦାବିପତ୍ରରେ ଦର୍ଶାଇଛି ଯେ ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ସଂପୂର୍ଣ୍ଣ ଫେଲ ମାରିଛି । ବର୍ତମାନ ସୁଦ୍ଧା ରାଜ୍ୟର ସମସ୍ତ ଜିଲ୍ଲାରେ ଏହି ଯୋଜନା ସଠିକ କାର୍ଯ୍ୟକାରୀ ହେବାରେ ବିଫଳ ହୋଇଛି । ରାଜ୍ୟର ଉପାନ୍ତ ଅଂଚଳବାସୀ ସହରକୁ ଆସି ଚିକିତ୍ସା ସୁବିଧା ପାଇବାରେ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ରାଜ୍ୟର ଗ୍ରାମାଂଚଳର ପାଖାପାଖି ୩୩.୪୫ ପ୍ରତିଶତ ବାହାରକୁ ଯାଇ କାମଧନ୍ଦା କରୁଛନ୍ତି ।

ପ୍ରାୟ ୨୫ ଲକ୍ଷ ଓଡିଆ ବାହାର ରାଜ୍ୟରେ କାର୍ଯ୍ୟ କରୁଛନ୍ତି । ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ କେବଳ ରାଜ୍ୟ ଭିତରେ ବାସ କରୁଥିବା ଓଡିଆମାନେ ଉପକୃତ ହେଉଥିବାବେଳେ, ଆୟୁଷ୍ମାନ ଭାରତ ଯୋଜନା କାର୍ଯ୍ୟକାରୀ ହେଲେ ପ୍ରବାସୀ ଶ୍ରମିକ ଓ ପ୍ରବାସୀ ଓଡିଆ ସର୍ବାଧିକ ଉପକୃତ ହୋଇପାରିବେ । ହେଲେ ଯୋଜନାର କାର୍ଯ୍ୟକାରୀ ହେବାର ୩ ବର୍ଷ ବିତି ଯାଇଥିଲେ ସୁଦ୍ଧା ବିଭିନ୍ନ ପ୍ରକାରର ଅଯୌାକ୍ତିକ କାରଣ ଦର୍ଶାଇ ଓଡିଶାବାସୀଙ୍କୁ ଏହି ଯୋଜନାର ସୁଫଳ ପାଇବାରୁ ବଂଚିତ ରଖୁଛନ୍ତି ।

୨୦୧୮ ମସିହାରେ ପ୍ରଧାନମନ୍ତ୍ରୀ ବହୁ ଆକାଂକ୍ଷିତ ଆୟୁଷ୍ମାନ ଭାରତ – ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନାର ଶୁଭାରମ୍ଭ କରିଥିଲେ । ଏହି ଯୋଜନା ଜରିଆରେ ଦେଶର ପାଖାପାଖି ୧୩.୪୪ କୋଟି ପରିବାର ତଥା ୬୫ କୋଟି ହିତାଧିକାରୀ ଉପକୃତ ହୋଇଛନ୍ତି ।

କୋଭିଡ୍ ସଂକ୍ରମଣର ୧ମ ଓ ୨ୟ ପର୍ଯ୍ୟାୟରେ ଆୟୁଷ୍ମାନ ଭାରତ ଯୋଜନାରେ ଅସଂଖ୍ୟ ଦେଶବାସୀ ମାଗଣାରେ ଚିକିତ୍ସିତ ହୋଇପାରିଛନ୍ତି । ଗତ ୨୦୨୦ ମସିହା ଅଗଷ୍ଟ ୧୫ ତାରିଖରେ ପ୍ରଧାନମନ୍ତ୍ରୀ ଶ୍ରୀ ମୋଦି ନ୍ୟାସନାଲ ଡିଜିଟାଲ ହେଲ୍‌ଥ ମିଶନ ଶୁଭାରମ୍ଭ କରିଛନ୍ତି ଏବଂ ଏହା ଦ୍ୱାରା ଦାଦନ ଶ୍ରମିକଙ୍କ ସମେତ ବିଭିନ୍ନ ରାଜ୍ୟରେ କାର୍ଯ୍ୟରତ ପ୍ରବାସୀଙ୍କ ପାଇଁ ବେଶ ଫଳପ୍ରଦ ।

ଆୟୁଷ୍ମାନ ଭାରତ ଯୋଜନାର କାର୍ଯ୍ୟକାରୀ ହେବାର ଦୀର୍ଘ ୩ ବର୍ଷ ବିତି ଯାଇଥିଲେ ସୁଦ୍ଧା ଓଡିଶାରେ ଏହାକୁ କାର୍ଯ୍ୟକାରୀ ନକରିବାରୁ ରାଜ୍ୟର ପ୍ରାୟ ୬୦ ଲକ୍ଷ ହିତାଧିକାରୀ ସୁଲାଭ ପାଇବାରୁ ବଂଚିତ ହୋଇଛନ୍ତି । ଅର୍ଥନୈତି ସର୍ଭେରୁ ଏହା ସ୍ପଷ୍ଟ ହୋଇଛି ଯେ, ଆୟୁଷ୍ମାନ ଭାରତ ଯୋଜନାକୁ କାର୍ଯ୍ୟକାରୀ କରିଥିବା ରାଜ୍ୟମାନଙ୍କରେ ସ୍ୱାସ୍ଥ୍ୟ ବୀମା ୮୯ ପ୍ରତିଶତ ବୃଦ୍ଧି ପାଇଥିବାବେଳେ ଅନ୍ୟ ରାଜ୍ୟମାନଙ୍କରେ ୧୨ ପ୍ରତିଶତ ହ୍ରାସ ପାଇଛି । ସେହିପରି ଶିଶୁ ମୃତ୍ୟୁ ହାର ୧୯ ପ୍ରତିଶତକୁ ହ୍ରାସ ପାଇଥିବାବେଳେ ଅନ୍ୟ ରାଜ୍ୟମାନଙ୍କରେ ଏହା ୨୦ ପ୍ରତିଶତରେ ରହିଛି ।

ନୀତି ଆୟୋଗଙ୍କ ଏସଡିଏକ୍ସ ସୁଚକାଙ୍କ-୩.୦ ଅନୁଯାୟୀ ଗତ ୨୦୨୦-୨୧ ଆର୍ଥିକ ବର୍ଷରେ ଓଡିଶାର ସ୍ଥାନ ସର୍ବଭାରତୀୟ ସ୍ତରରେ ୧୮ତମ ଅଛି ଏବଂପ୍ରତି ଲୋକ ପିଛା ସ୍ୱାସ୍ଥ୍ୟ ପାଇଁ ମାତ୍ର ୧୫୦୧ ଟଙ୍କା ଖର୍ଚ୍ଚ କରାଯାଇଥିବାବେଳେ ଜାତୀୟ ହାର ୧୯୪୪ ଟଙ୍କା ଖର୍ଚ୍ଚ ହୋଇଛି । ପଂଚଦଶ ଅର୍ଥ କମିଶନ ରିପୋର୍ଟ ଅନୁଯାୟୀ ଡାକ୍ତର ସମସ୍ୟା କ୍ଷେତ୍ରରେ ଓଡିଶାର ସ୍ଥାନ ୧୨ତମ ରେ ଅଛି ଏବଂ ପ୍ରତି ୧୮୬୪ ଲୋକଙ୍କ ପାଇଁ ଜଣେ ମାତ୍ର ଡାକ୍ତର ଅଛନ୍ତି ।

ଅନ୍ୟ ପଟେ ଜାତୀୟ ସ୍ତରରେ ଏହା ୧୪୫୬ ଅଛି । ସ୍ୱାସ୍ଥ୍ୟ ମନ୍ତ୍ରଣାଳୟ ତଥ୍ୟ ଆଧାରରେ ଓଡିଶାରେ ପ୍ରତି ୧ଲକ୍ଷ ଲୋକଙ୍କ ପାଇଁ ମାତ୍ର ୫୯ ଶଯ୍ୟା ରହିଛି । ସ୍ୱାସ୍ଥ୍ୟ ଭିତିଭୂମିରେ ଓଡିଶାର ବହୁ ପଛରେ ଅଛି । କୋଭିଡ୍ ସଂକ୍ରମଣ ପରିଚାଳନାରେ ରାଜ୍ୟର ବିପର୍ଯ୍ୟସ୍ତ ସ୍ୱାସ୍ଥ୍ୟ ସେବା ପଦାରେ ପଡିଛି । ରାଜ୍ୟର ଗୋଟିଏ ହେଲେ ସରକାରୀ ଡାକ୍ତରଖାନାରେ ଅକ୍ସିଜେନ ପ୍ଲାଂଟ ନଥିଲା ।

LEAVE A REPLY

Please enter your comment!
Please enter your name here